Kacarita ada anak cerik muani, gegaene sai-sai mamaca tur malajahin enta-ental pakaryan anake wikanwikan imaluan di Den Bukit. Ia paling ririha di desane, ento awinan ia kadadiang panua. Disubane ia matuuh duang dasa tiban, bisa suba ia masiluman apang magoba len, kanti tusing kingetan baana teken pianakne, muah cicingne madan i jaga, tusing kingetan bana ngadekin bone. Buina ia dueg pesan madewasa, ento kerana ia pepes pesan tekain tamiu luh muani, nakenang dewasa magagaenan, mamula mulaan, mapawarangan muah lenan. Sawireh pagaene muah pituturne teken anak len melah melah, mawinan ia sugih tur kasub madan balian Sandi. Ia tusing pati ngalapangpipis liu liu, pamuat pangaptine apang ia paling kasuba di Den Bukit. Ia ngelah pianak abesik, sai sai ajaina, mani puan apang dadi nyan geginan dewekne. I balian Sandi sing nyak kasor teken balian Sadya musuhne uling cerik. Baliane ento paling tuana di desane, nanging dayane riet.
Sedek dina anu, I Tantra panak balian Sandine katuturin baan pamangkune pura Dalem. Pamangkune kone makatang peti misi ental let let. Entale ento pesuanga diarepan krama desane. Nanging nyang adiri tuaranyidayang negesin kecap sane munggah dilontare ento. Kecap basa dilontare ento kuna pesan, mirip buka ne munggah di Raja Puranane. Balian Sadya balian sane kaucap ririh ugase ento masih ia ditu, nanging masih tuaranyidayang negesin nyang abuku, saliun anake ditu tuaranyidayang negesin. Lantas teka ITantra ajaka bapane, I balian Sandi. I balian Sandi maliin entale ento, sambil mangutan dugase maca. Jlemane ane ngiter balian Sandi pada jejeh, nanging nyanane kenyem tur pada kene kone kenehne, “ ambul apa ya kaririane balian Sandi, padaang teken balian Sadya, kasub uling malu, tau teken bongkol bongkol Mantra muah Usada.”
“nggih” buin matakon balian Sadya, “sapunapi jrone mrasidayang midartayang tegesne”, “Jro sareng sami, tiang tan mrasidayang pisan negesin kecap entale puniki,” mara keto pamunyin balian Sandine, makejang anake maruyuan, “balian Sadya tunian jejeh pesan kadene balian Sandi nyidaaang masanin entale ento, mara tingalina musuhne majujuk tur madekesan makesiab, lantas kenehne dadi kendel pesan.” lantas petine ento celepanga ka gook sisin jalane. Sing ada pakenoha mejangan. Mawanan anake pada mulih.
Disubane balian Sandi teked jumah lantas ia ka sanggah negak di tongos ibi puane, lantas ia ngomong teken pianakne. “cening, ken ken kakeneh baan cening antuk ento.” “bapa, tiang suba nawang bapa mapi mapi ngorahang sing nawang, nanging liat bapane nyiriang bapa nawang artin entale ento, tiang ngidih olas teken bapa, apa isin entale ento.” “cening Tantra, ane munggah dientale ento mantra mauttama pesan tur tusing ada anak nawang di jagate. Mantrane ento kasuratang baan padanda ulian mireng pangandika bhatara. Keweh gati bapa maca sakane, krana tulisane suba saru. Nyanan iraga paling lontare ento tur palajain apang sing ada anak ngelahang di jagate.”
Nyanan petengne balian Sandi lan pianakne I Tantra ngamaling entale ento tur palajaina. Tan sue, balian Sandi suba suud malajain entale ento, lantas kulukne anggona conto palajaane. Kulukne lantas punggela, tendasne pegat, lantas punggelane atepanga tur mantraina, kulukne buin idup. Tantra ngon teken mantra sane munggah di entale ento. Tantra ngomong kene teken bapane, “bapa, tiang dot pesan mati, sakewala buin nyan idupang tyang.” “cening, da ne anggone palalian cening, mantrane ene sing dadi anggo palalian.” mara keto bapane nyautin lantas macegik I Tantra. “buih bapa, yen keto sing ja jati jati bapa sakti, bantes mapaidihan keto sing isinina.” lantas bapane nyemak prabot tur ajaka dua majalan kasisin tukade, ditu lantas Tantra sepega teken bapane, sakewala punggelan I Tantra ulung ka tukade, ditu I balian Sandi jejeh, tur sambil ningalin punggelan I Tantra ane ulung joh di tukade. Mapan bas kaliwat makelo sing tepuka punggelan ITantra, lantas balian sandi munggel kulukne, punggelan kulukne pejanga diawakne ITantra, tur mantraina. Disubane atep ITantra mapunggelan kuluk tur dadi babaung lantas malaib katengah alase, ditu balian Sandi maseselan. Punggelan I Tantra ane ulung ka tukade, kaamah teken be julite, mara gati amaha punggelane Tantra, lantas neket ditendas be julite tur sing dadi kelesa. Keto kadadin babaung sane maawak jelema matendas kuluk, lan bejagul sane mawak be julit matendas jelema.
Tidak ada komentar:
Posting Komentar